سيارة شبابية و رياضية كوبية أو suv و مميزة تحت ٢٥٠ ألف مستعمل أو جديد

247
10

مستعملة أو جديدة و يفضل أن تكون فخمة

عن الكاتب

10 تعليقات

  1. بهذه المواصفات يا اخوي فهد بتجيك خيارات كثيرة جداً جداً.
    اول سيارة SUV خطرت في بالي هي فورد ايدج, سيارة رائعة. تدمج بين السمات الرياضية والفخمة. وسعرها ما يتعدى 150 الف جديدة (في السعودية).
    وفي عندك دودج تشارجر, هي مو "كوبيه" لكن شبابية جداً. وقوة محرك فئة SRT8 منها رائعة. وفيها ميزات تخليها فاخرة, مثل حامل الأكواب بنظام التبريد والتسخين. مو متأكد من سعرها لكن اعتقد انه في حدود الـ 190 الف.
    واذا تبغا كوبيه بحت, عندك فورد موستنج GT500. هي رياضية جداً, مو فاخرة مرة. قوتها مبهرة جداً, وشكلها من الخارج يعطيها وصف "سيارات العضلات" الأمريكية بضخامتها وشراستها. اعتقد سعرها في حدود الـ 200 الف.
    واذا ماودك في امريكي, عندك الألمانية اودي. بالتحديد A5 كوبيه, اعتقد اغلى فئة فيها 250 الف. اكيد فخمة ولكن مو قوية, اكبر محرك فيها هو V6 يولد حوالي 270 حصان.
    انفينيتي FX اختيار حلو بعد, يبدأ سعرها من حوالي 200 الف ريال. ومعروف انه انفينيتي هي الفرع الفاخر لنيسان.
    في اختيارات كثيرة جداً اخوي, عشان كذا انصح تحاول تضيّق الدائرة شوي, عشان يسهل البحث عن السيارة. فكّر في نفسك, تحب امريكي ولا اوروبي ؟ هل في ميزة تبغاها اجبارية في السيارة زي نظام صوتي قوي او تقنيات راحة وذكية ؟ تبغاها كشف ولا سقف صلب ؟ حط الأشياء اللي تفضّلها في السيارة في بالك عشان يسهل على الكل اقتراح افضل السيارات لك انت شخصياً.

    + 0- 0
    1. Fahadalhusainan

      الله يعطيك العافية يا أخوي يزيد افضل أمريكي بسبب قوة المحركات والشكل الشبابي البحت وافضل أن يكون السقف قابل لي الإزالة

      + 0- 0
      1. Fahadalhusainan

        و افكر بالأودي ار٨ مكن ألقا مستعملة و افكر بالتشالنجر وودي اسأل كم سعر الكورفت c7

        + 0- 0
      2. اوكي حلو, كذا صار البحث شوي اسهل. انا باذكر جميع السيارات اللي اعتقد (شخصياً) انها الأفضل من الفئات اللي طلبتها من الشركات الأمريكية, رغم انه في سيارات اوروبية رائعة بالمواصفات اللي تبغاها مثل ما ذكر اخوي زياد بالأسفل, بورش كايمان S. والظاهر انه السقف القابل للإزالة مو بذيك الأهمية بالنسبة لك دام انك تفكّر في تشالنجر, عشان كذا ماحسبت له حساب كبير. عموماً, هذي اقتراحاتي لك:
        ----------------
        اضافة للي ذكرتهم فوق (فورد موستنج وفورد ايدج وتشارجر) عندك كاديلاك CTS كوبيه. سيارة خارجيتها روعة وجداً فخمة ومع ذلك كوبيه. اعتقد انها توصل لـ 220 الف بمحرك V6, اما CTS-V بمحرك V8 اعتقد تتعدى الـ 250 وتوصل لـ 300 الف. لكن اذا قررت على هذي السيارة انصح تنتظر لأنه الجيل الجديد نزل, وبشكل افضل واجمل. ويوصل الأسواق الخليجية نهاية العام او بداية 2014.
        ----------------
        بالنسبة لكورفيت, جنرال موترز اعلنت عن اسعارها الرسمية. حتبدأ الكوبيه من 194 الف ريال, والكشف بحوالي 213 الف ريال (هذا سعرها بعد التحويل من الدولار). لكن تختلف الأسعار بشكل كبير عندنا عنهم. هذي الأسعار زيادة 5 الاف عن الجيل الماضي عندهم. الجيل الماضي C6 سعره عندنا يبدأ من حدود 220 الف, يعني اتوقع زيادة كبيرة فيها. لكن لو قدرت عليها تعتبر خيار رائع جداً.
        ----------------
        شيفروليه كمارو خيار لازم يتم اقتراحه, رياضية وكوبيه بحته. اذا عجبك الشكل الجديد انتظر له ينزل الأسواق. او شوف كمارو ZL1 كوبيه 2013, سعرها في حدود الـ 240 الف. واذا قدرت تضيف 10 الاف تاخذ الكشف منها.
        ----------------
        كرايسلر C300 مو مرة رياضية, لكن مثلها مثل تشارجر, شكلها لايق عالشباب جداً, وغير كذا فاخرة. لو فكّرت فيها عندك فئة SRT8 منها قوتها 470 حصان, وسعرها حوالي 216 الف ريال.
        ----------------
        دام في بالك دودج تشالنجر, ودي بس انبّهك. اذا بتشتريها لا تشتري الا SRT8, لأنه ابداً ماتستاهل تشتريها بمحرك V6. ضعيفة جداً بالمحرك هذا, هيونداي جينيسيس كوبيه افضل منها. لكن الـ SRT8 روعة, وقوتها قوة التشارجر والـ C300, حوالي 470 حصان.
        ----------------
        والإقتراح الأمريكي الأخير مني هو جيب جراند شيروكي, هي وفورد ايدج اشوفها احلى سيارات SUV امريكية للشباب. جيب جراند شيروكي اكبر من ايدج طبعاً, تعتبر SUV متوسطة الحجم. يمكن ماتحسها مرة "للشباب" لكن رائعة جداً, وبمحرك جامد لـ SRT8 منها, قوتها 465 حصان, وغير كذا السيارة معروفة بفخامتها. اذا عجبتك جراند شيروكي, انصحك تنتظر موديل 2014 منها, اتغيّر شكلها بشكل بسيط. صارت "مرعبة" اكثر. وغير كذا فئة SRT منها صار تسارعها افضل بسبب ناقل الحركة الجديد.
        ----------------
        من السيارات اللي ذكرتها, اللي يجي منها كشف فورد موستنج, وكمارو, وكورفيت فقط.
        هذي بالنسبة لي افضل سيارات امريكية SUV او كوبيه رياضية بحته, ان شاء الله اكون افدتك. واذا عندك اسئلة عن سيارات من شركات غير امريكية اتفضّل اخوي.
        احب انبّه بس اخوي انه الأسعار اللي كتبتها مو لازم تكون صحيحة, مو متأكد منها 100%, انا اخذتها من مواقع. لكن متأكد -ان شاء الله- انه السيارات تكون في حدود هذي الأسعار.

        + 0- 0
        1. Fahad alhusainan

          في الرينة روفر ايفوك جميل جداً و إذا ما تعبتك طيب السيارات الألمانية وليس شرط أن تكون السيارة مطابقة لي الي طلبته لكن شرط أن تكون كوبيه

          + 0- 0
          1. Fahad alhusainan

            الرنج روفر ايفوك '

            + 0- 0
          2. اوكي اخوي, هذي اقتراحاتي لأفضل سيارات اوروبية:
            ------------------
            في عندي اختيارات لك من شركة لوتس. لوتس ما تباع في الخليج الا في السعودية, والبحرين وقطر. وكيل السعودية والبحرين هو الغسّان, هو نفسه وكيل مكلارين بعد. الشركة غير متواجدة في الإمارات والكويت وبقية دول الخليج. عموماً, سياراتها رائعة ونادرة, راح تكون مميّز.
            لوتس Exige يبدأ سعرها في السعودية من 250 الف. هي سياراتها شكل بس, قوتها مو ذاك الشي (220 حصان). وصراحة لأنها نادرة ما اعرف هل هي معتمدة ؟ اقترحت هذي السيارة بسبب ندرتها واذا تبغا شي مميز مافي مثل هذي.
            وفي عندهم لوتس Elise, هذي ارخص تبدأ من حوالي 205 الاف. ولوتس Evora هي "الأقوى", وقوتها 276 حصان, لكن سعرها يبدأ من 260 الف.
            يبغا لك تسأل عن اعتماديتها وباقي الكلام هذا. مثل ماقلت اقتراحي لذي السيارة بسبب ندرتها, تكون مميز جداً بها. شوف اسأل واذا قدرت جربها, ماتخسر شي.
            ------------------
            نخرج عن الغير مألوف, ونروح للي نعرفه. مرسيدس A-Class, هذي الهاتشباك رووووعة جداً. جميلة السيارة, وسمعة مرسيدس معروفة. فئة A45 AMG فيها اقوى محرك اربعة سلندر في العالم, ينتج فوق الـ 300 حصان. اعتقد 330 او شي زي كذا. سيارة روعة وانصح بها. وعندك شقيقتها CLA, هذي لسا مانزلت الأسواق, لكن تستاهل تنتظر لها لو كان سعرها مناسب لك. بشكل عام فئة A-Class من مرسيدس روعة وشبابية فاخرة.
            اقتراحي الثاني من مرسيدس هي SLK الكوبيه. سعرها يبدأ من حوالي 200 الف اعتقد. لكن فئة AMG منها غالية, يبدأ سعرها من 290 الف.
            ------------------
            من بورش, عندك بوكستر. مايحتاج اتكلم عن الشكل والفخامة, معروفة بورش. يبدأ سعر فئة S من حوالي 220 الف اعتقد. ويوصل لـ 320 الف. ماا الفئة الأساسية سعرها حوالي 200 الف.
            ومثل ما اقترح لك اخوي زياد وسبقني, بورش كايمان, يبدأ سعر فئة S الرياضية من 230 الف ريال, والفئة الأساسية حوالي 200 الف بعد. الفرق بين فئات S والأساسية في بورش كايمان وبوكستر حوالي 50 الى 60 حصان, وطبعا شكل رياضي اكثر.
            اول SUV اوروبية اقترحها هي بورش كايين, هذي سيارة ناجحة جداً. لكن اغلى شوي من كايمان وبوكستر. السعر الأساسي لها يبدا من 240 الف, عشان كذا اذا تبغا شي من بورش اعتقد انه افضل خيار هي الكايمان.
            ------------------
            من فولكس واجن عندي لك سيارتين. قولف (طبعاً) وشيروكو. كلها سيارات رياضية وشبابية, وسعر اقوى فئات منهم الـ R, سعرها معقول وبيدك ان شاء الله.
            سعر قولف R يبدأ من حوالي 156 الف, لكن هذا الشكل القديم. لأنه الجيل السابع من قولف R لسا ماكشفت عنه الشركة. اذا ماتقدر تنتظر خذ الجيل السابع من قولف GTI, يبدأ سعرها من 116 الف.
            فولكس واجن شيروكو R يبدأ سعرها من 150 الف, هذي كوبيه هاتشباك, تحسها رياضية بسبب سقفها المنخفض. ممتازة السيارة.
            طبعا السيارتين هذي داخلياتها من بفخامة السيارات اللي اقترحتها قبل.
            ------------------
            ارجع اقترح اودي A5 لك, الفئة الأساسية منها, لأنه S او RS اعتقد تزيد عليها 100 الف واكثر. سعر الفئة الأساسية كوبيه يبدأ من حدود 179 الف الى 250 الف. اما الكشف يبدأ سعرها من حوالي 200 الف.
            ------------------
            كان ودي اقترح لك من بي ام دبليو, لكن الفئة الاولى اللي تنافس مرسيدس A-Class ابداً مو اجمل من مرسيدس. عشان كذا ماباقترحها لك, مرسيدس A-Class شكلها احلى بكثير من الفئة الأولى.
            السيارة الثانية اللي كنت باقترحها لك من بي ام دبليو هي الفئة الثالثة كوبيه. لكن بي ام دبليو حتغيّرها الى الفئة الرابعة كوبيه, ومرة شكلها افضل. عشان كذا اذا ودّك فيها انتظرها احسن لك ولا تاخذ الفئة الثالثة كوبيه.
            ------------------
            من لاند روفر مثل ماقلت انت عندك رينج روفر ايفوك, SUV شبابية جداً وفي منها كوبيه. اعتقد اعلى سعر لها هو 255 الف ريال, ما اتعدت الحد المطلوب بشكل مرة كبير. عندها محرك واحد فقط ينتج 240 حصان. واعتقد الفخامة معروفة في لاند روفر.
            كنت باقترح لك رينج روفر سبورت الجديدة, لكن هذي غالية جداً, تبدأ من 350 الف الى 500 الف. ورينج روفر الفاخرة يبدأ سعرها من 380 الى 600 الف ريال.
            ------------------
            في سيارة ثانية بريطانية كنت باقترحها لك, هي جاكوار F-Type, توها اتدشنت واطلقت في اسواق الخليج. سعرها يتعدى المطلوب منك, يبدأ من حوالي 290 الف. لكن اذا قدرت انسى كل شي ذكرته لك. سيارة جميلة بمعنى الكلمة, يكفي انها فازت بجائزة افضل تصميم في العالم في عام 2013. روعة السيارة.
            ------------------
            هذي اقتراحاتي لك من اوروبا. بالنسبة لي هي افضل السيارات. طبعاً اللائحة طويلة مثل ماتشوف, الأوروبيين ينتجون اجمل وافضل السيارات في العالم, وبالأخص الألمانيين, سيارات رائعة بمعنى الكلمة.
            ان شاء الله اكون افدتك اخوي, واعيد واكرر الأسعار مو متأكد منها 100%, لكن قريبة منها.

            + 0- 0
  2. عندك الكايمان S سياره في قمه الروعه ومايحتاج من بورشه وسعرها بـ٢٣٥٠٠٠

    http://www.porsche.com/middle-east/_riyadh_/models/cayman/cayman-s/detail/

    + 0- 0
    1. Fahad alhusainan

      صراحه جداً جداً جميلة ودخلت مزاجي

      + 0- 0
  3. Fahad Alhusainan

    الله يعطيك العافية أخوي يزيد وصراحه ما ادري كيف ارد جميلك وشكرا جزيلا

    + 0- 0

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

ارفع صورة مع تعليقك



‎مقالات ذات صلة

مواضيع من مواقع صديقة