في موتر بيصبر زي الفكتوريا ؟؟

11530
9

السلام عليكم ورحمة الله وبركاته
الحمدلله الذي بلغنا رمضان ويبارك لنا فيما بقي منه

بعد متابعة طويلة ( اتوقع 6 سنوات ) ، صراحة أنا بخش في الموضوع بدون مقدمات، بسم الله :

طبعا أنا بشتري موتر في حدود ذا الشهر الى نهاية الاجازة تقريبا ، والسالفة وما فيها ان الفيكتوريا م بقى فيه قطعةم خربت ( م فيه صالح الا المكيف و البوري هههه ) غير كذا (( كل شيء )) خربان من المكينة ال7 سلندر ( فيه سلندر ميت ) والتفتات والتقطيع القوي اللي فيها الى المساعدات واليايات والمقصات والعكوس وكل شيء تحت خربان ( كل شيء بمعنى الكلمة ) الى القزاز اللي م ينزل ( الدينمو حقه خربان ) الى الفحمات اللي منتهية من قبل ثلاث شهور والهوبات اللي يحتاج لها خرط الى الكفرات اللي باقي لها أقل من ربع عمر ، طبعا كل هذا يعود الى استخدامي الهادي للسيارة ( طبعا طعست فيها وطلعت بها كل الارصفة اللي ف الرياض قاومت فيها / درفت فيها / والزيت اغير العلب العايدية اللي انها حقت 5 آلاف اغيرها كل 14 أو 15 غير اني في الويكند ممشاي الطبيعي حول 700km في اليوم الواحد والايام العايدية حول 200km ) ف بالمجمل والله السيارة انها صبرت معي وعز الله انها ما قصرت ( والله انها أفضل اعتمادية من الكوريلا والكامري والكراتين الاسيوية ذي كلها ولا في موتر بيصبر صبرها)

المهم ان عمرها راح وأنا وضعي طبيعي معها لاني انسان م اهتم باي شيء في الفترة الأخيرة صرت اركب واحط السماعات و م أحس بالمصنع اللي جنبي و ف العادة م اسوق الا وأنا آكل ،

المهم ان الوالد قدر الله عليه وأخذ سيارتي قبل أسبوعين لاني أخذت موتره ، الزبدة انه جاني زعلااان :rolleyes1: وشب فيني : أنت كيف تمشي كذا ، أنت مجنون ، ليش م تقوليي … ومن هالكلام لأنه هو انسان محافظ درجة اولى : محافظ ع الصيانة أول بأول ، أي لمبة يشوفها مولعة بالطبلون يقول لي ود السيارة الوكالة مع انه فاهم ويعرف معناها …

وكلمة مني وكلمة منه الى ان رسى على :
1 _ فصل بطارية الموتر ونسم ف القزاز شوي
2_ اعتبر السيارة تألف الى اشعار آخر

وقال لي شوف لك موتر بحدود ستين الى سبعين كحد اقصى ، ويكون الموتر أبو سنة أو سنتين بالكثير و بعدها : يا بطلع بعثة ، أو بشتري موس gt . والموتر اللي بشتريه يمشينى الى ذلك الوقت !!
أو يمكن اخليه يقدم موعد شراء الموس بس اخليها v6 فل الفل (الين م يوافق باشوف الموتر أبو السبعين )

فانا جاي استشيركم وأتمنى انكم تفيدوني :
1 _موتر بهذي القيمة .
مع العلم اني اكره ثلاث اشياء في عالم السيارات كره مو طبيعي واللي هي : الدفع الامامي ،ال4سلندر ،التويوتا … يعني لو تجيب لي افالون أو كامري الشيوخ بذا السعر ما اخذتها لاني متعود كل المواتر اللي مرت علي 8سلندر وقير علاقي ( جموس و فوردات و صابونه وأخيرا ربع نيسان 09)
فلذلك ما عندي مشكلة آخذ مستخدم لأنها كللها تتحمل بس ما ادري عن المستخدم من الكراتين الاسيوية .
2 _ كيف الشراء من الامارات أو من أمريكا ؟؟ لأنها بتجي انظف من اللي في السعودية وارخص
أنا يمكن عارف للشراء من أمريكا بس الامارات هل فيه مواقع ؟؟ أو مالها الا اني اروح بنفسي ، لاني طبعا مأ بأدل هناك .

الله لا يهينكم وادري اني طولت عليكم والموضوع لحسة بس اعذرونا السلام عليكم ورحمة الله وبركاته

 

عن الكاتب

ZAZ

9 تعليقات

  1. آسف على اللخبطة واعادة الموضوع مرتين !!

     
  2. تجيب لك فورد كروان فكتوريا امريكي نظيف جدا جدا من 2007 الى 2011 فل اوبشن بالراحه اذا اخذت موديل اقل راح يزيد المبلغ اللي معك او لموديل 2011 يوصل 70 ما مشى كثير و المساعدات حقته ناعمه و راسي اكثر من السعودي في السفر

    او

    تاخذ فورد كروان فكتوريا سعودي من 2008 الى 2010 ممشاه 80 الف الى 120 طبعا موديل اقل = سعر اقل

    السعودي فيه فرق عن الامريكي في المكيف الخلفي و اختلاف بسيط في ظفيره الطبلون الكهربائيه و مساعدات السعودي قاسيه شوي و تتحمل الكرف اكثر من الامريكي

    طبعا قلت لك هالكلام لانك باين عليك مقتنع في الفكتوريا

     
    1. معك حق مافي شيء كويس بذا السعر الا الفيك

      بس الموتر اللي بشتريه مؤقت يعني بعد سنتين بشتري موتر ثاني فمنها : حبيت اغير شوي ، لو أخذت موتر مستعمل 09 أو 10 بلقاه باقي فيه نظافة

       
  3. غير معروف

    السيارات القديمة بشكل عام أفضل

    السيارات الحين اصبحت استهلاكية

    اذا كانت الفكتوريا لهدرجة عاجبتك وعايش معها قصة حب

    خذ لك فكتوريا موديل أحدث من اللي عندك وانتهى الموضوع
    ومع احترامي لك .. لكن مافي سيارة عاجبتك

     
    1. معك حق السيارات القديمة ( تشتريها عشان تخدمك ) اما الجديدة ( تشتريها عشان تخدمها )
      والله انك صادق الفيكتوريا قصة حب
      ههههههه ليش مافي موتر عاجبني ؟؟ أنا في كل فئة لي موتر ، وترى أنا نظامي أمريكي في كل شيء أكثر من انه آسيوي : كل شيء عندي كبير
      لا في الاكل ولا في المواتر ولا في غيره ( بالعربي استهلاكي ) وبعد التفكير اكتشفت ان فيه كم موتر بحول ذي القيمة ومنها : الوحش فورد f150 غمارتين 2011 وتحت
      أو عندك الكلايسلر 2010 ( بس ذي تخوف كثير يشتكون منها ) .

       
  4. والله علي حسب استخدامك خياراتك محصورة انت محتاج دبابة لكن برشحلك اثنين

    كراون فيكتوريا
    تويوتا هايلوكس

     
  5. يزيد الغامدي

    مادام هذا استخدامك دورلك فكتوريا ﻷن مافي اﻻ هو بيصبر معك

     
  6. انت تحب الامريكيه فقط . ودفع خلفي . ومعك 60 الف . عندك كرايسلر او شارجر او تشالنجر امريكيات اصيله . كابرس استراليه واسمها هولدن . تحصل بالمبلغ السيارات اللي ذكرتها لك . ولا تنسي الكدلك سي تي اس . تحصل موديل جديد ورخيصه .لان الكدلك ينزل سعره عند المبيع .ترا مو عيب بالسياره لا بس هذه اذواق الناس يرفعون سعره او ينزلونه

     
  7. فتك ٠٧٠٨٠٩ مافي احسن لاستخدامك او تويوتا لاند من ٠٤٠٥٠٦

     

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

ارفع صورة مع تعليقك



‎مقالات ذات صلة